La Societât Filologjiche Furlane si da adun in Congrès a Bertiûl
Pal Sodalizi furlan e je la prime volte intal Comun dal Friûl di Mieç
Domenie ai 5 di Otubar dal 2025 la Societât Filologjiche Furlane si da adun a Bertiûl: pe prime volte chest comun dal Friûl di Mieç al da acet al congrès sociâl dal Sodalizi, il numar 102 inte sô storie e «la manifestazion impuartant tra chês inmaneadis dal nestri istitût – al motive il president Federico Vicario –, une cunvigne par promovi e valorizâ il patrimoni di valôrs e di storie di un teritori ch’al vîf di une particolâr combinazion di elements di tradizion e di inovazion, di ambients e di nature, di art e di lavôr».
«Il Congrès numar 102 – al dîs il Vicepresident de Regjon Friûl Vignesie Julie e Assessôr ae Culture Mario Anzil – al segne il travuart di plui di un secul al servizi de comunitât. Tal cors di ducj chescj agns la Filologjiche e à puartât indevant tant che une mission la tutele e la promozion de lenghe e de culture furlanis, e à custodît e valorizât savês, memoriis, bens materiâi e imateriâi dal nestri teritori. La zornade dal congrès e pant ce che la Filologjiche e je: lidrîs e avignî dutun, là che il confin, gjeografic e temporâl, nol divît ma al unìs, deventant un puint e une puarte tra la memorie, il timp presint e la inovazion».
A Bertiûl la Filologjiche e cognossarà une comunitât unide e vivarose, che e à tant ce dî: «Lis scuviertis archeologjichis dai ultins vincj agns – e ricuarde Eleonora Viscardis, sindic– a àn impiade une lûs sul nestri passât e nus fasin capî miôr lis lidrîs de nestre identitât. Cussì ancje i afrescs dal Cinccent inte glesie parochiâl di San Martin Vescul, che a son stâts scuvierts e restaurâts di resint». E ancjemò dongje, lis ricjecis ambientâls dal lûc, che nus ricuardin la impuartance di tignî di cont la nature cuntune gjestion responsabil dal paisaç e dal ambient, elements di fonde par une incressite sostignibil de comunitât.
Ducj chescj argoments si cjatiju dentri dal preseôs numar unic “Bertiûl”, il volum par cure di Andrea Tilatti publicât pe ocasion e che al vignarà presentât al congrès; scuasi 700 pagjinis sioris di fotografiis che a cjapin dentri i contribûts di passe 40 autôrs su la archeologjie e la storie, la culture e lis arts, la gjeografie, ambient e economie dal teritori.
La zornade si vierzarà a lis 9 a buinore cu la messe par furlan inte glesie parochiâl di San Martin Vescul: al disarà messe pre Davide Gani, cul acompagnament dal grop corâl di Bertiûl e Possec direzût dal mestri Giancarlo Schiavo. A lis 10 la Filarmoniche “La Prime Lûs 1812” direzude dal mestri Samuel Miconi e compagnarà i congressiscj fin tal Auditorium “Ottavio Paroni” li che, aes 10 e mieze, a tacaran lis voris: daspò dal salût dai sorestants al fevelarà il gjenerâl de Aeronautiche Militâr Marco Lant, natîf di Bertiûl, sul teme “Tradizion e cambiament”. O scoltarìn ancje la relazion dal professôr Enos Costantini su la storie de agricolture dal teritori, “Cui che al po al à vacje e bo”. Daspò de presentazion dal numar unic “Bertiûl”, a saran premiâts i vincidôrs de XXII edizion dal Premi “Andreina e Luigi Ciceri”, che al premie lavôrs sientifics su aspiets de culture e dal teritori dal Friûl. I moments musicâi dal congrès a saran par cure dal grop di otons Brassevonde, cu la partecipazion dal sopran Maria Giovanna Michelini.
Tal dopomisdì a son in program trê visitis ae scuvierte dal teritori: aes 3 e mieze tal parc di vile Colloredo-Venier a Sterp e al rôl monumentâl, simpri compagnâts dai Brassevonde; aes 4 ai afrescs restaurâts inte glesie parochiâl di Bertiûl e aes 4 e mieze ae cantine Cabert.
Il Comun, dutun cu lis associazions locâls, al à metût adun ancje un biel program manifestazions in ocasion dal congrès de Filologjiche: si tache vinars ai 3 di Otubar aes 7 di sere cul spetacul “Ce crodistu di fâ?” cun Federico Scridel e Carla Manzon par cure dal Teatri Stabil Furlan inte cort de Cjase Laurenti in vie della Posta (s’al plûf, tal Auditorium comunâl). Si va indevant vinars ai 10 di Otubar aes 9 mancul un cuart di sere tal Auditorium cuntun altri spetacul teatrâl, “Il zavaion”, par cure de Associazion culturâl “Clâr di Lune”, biel che vinars ai 17 di Otubar, simpri aes 9 mancul un cuart di sere inte sale consiliâr dal municipi, la archeolighe Tiziana Cividini e fevelarà des ultimis scuviertis archeologjichis; al vignarà ancje presentât, par cure di Natura 3, il librut “Vite da scoprire. Flora, fauna e piccoli segreti nel territorio di Bertiolo” cu lis fotografiis di Luciano Kracina. Par finî, vinars ai 24 di Otubar tal Auditorium “Ottavio Paroni” il numar unic “Bertiûl” al vignarà presentât e dât fûr ae comunitât.
Dut il program al è sul sît internet www.filologicafriulana.it
Foto anteprima: Bertiolo – Foto Carmine Sicondolfi
